Кеше Орталық коммуникациялар қызметінде Премьер-Министрдің бірінші орынбасары Бақытжан Сағынтаев бастаған бірқатар министрлер баспасөз мәслихатын өткізді. Онда еліміздің әлеуметтік-экономикалық даму үрдістері сараланып, осы жылдағы экономикалық дамудың қорытындысы шығарылды. Осы брифинг арқау болған мақала «Егемен Қазақстан» газетінде «Экономикалық өсім ойдағыдай» деген тақырыппен берілген. Басылымның жазуына қарағанда, Өңірлік даму министрі Б.Жәмішев аймақтардағы әлеуметтік-экономикалық мәселелер туралы баяндап, түрлі мемлекеттік бағдарламалардың жергілікті жерлерде жүзеге асырылу барысымен таныстырды. Сондай-ақ, салаға қатысты жаңадан дайындалған заң жобалары жөнінде де әңгімелеп, олардың тиімді тұстарын таратып айтып берді. Ол республика аумағын ұйымдастырудың бас схемасына арнайы тоқталып, қала құрылыстарында бұл игіліктің қандай пайдасы болатындығын таратып айтты. Мұндай бас схема елімізде тұңғыш рет жасалыпты. Б.Жәмішевтің айтуына илансақ, өңірлерді дамыту барысында схеманың келтірер пайдасы мол болмақ.
***
«Ұлттық спорт түрлері қауымдастығының кезектен тыс отырысында биылғы жылдың қорытындысы шығарылып, келесі жылдың күнтізбелік жоспары жасалды. Басқосу барысында «Нұр Отан» партиясының хатшысы, Ұлттық спорт түрлері қауымдастығының президенті Қайрат Сатыбалдыұлы баяндама жасады. Ол Спорт және дене шынықтыру істері агенттігінің дерегіне сүйене отырып, қазіргі таңда еліміздің 250952 азаматы ұлттық спортпен айналысып жатқанын жеткізді», — деп жазады «Айқын» газеті жұма күнгі нөміріндегі «Шетелдіктер бізді ұлттық спортымыз арқылы тануы тиіс» деген тақырыптағы мақаласында. «ЭКСПО — 2017» халықаралық көрмесіне келетін шетелдіктер біздің ұлттық ерекшелігімізге, дәстүрімізге, спортымызға айрықша назар аударатындығы белгілі. Осыны ескере отырып, біз жалпыұлттық жобаға өз үлесімізді қосуымыз керек. Шетелдіктер бізді саясат, экономика арқылы ғана емес, ұлттық спортымыз арқылы да тануы тиіс», — деді Қ.Сатыбалдыұлы. Оның пікірінше, ұлттық спорт түрлері қауымдастығының қазіргі тұжырымдамасын заман талабына жауап бере алатын дәрежеге жеткізген жөн. Сонымен қатар биыл қолға алынғанымен тиянағын таппай қалған ұлттық спортты дамытудың мемлекеттік бағдарламасын біржақты қылып, Үкіметке ұсыну керек. Бұл бағдарлама көкпар, аударыспақ, теңге ілу, қыз қуу, жамбы ату, қазақ күресі, тоғызқұмалақ және басқа да ұлттық спорт түрлерін дамытуы тиіс. Кезегі келгенде сөз сөйлеген Ұлттық спорт түрлері қауымдастығының жаңа басшысы Б.Тілеухан Қазақстан тарихында емес, әлем тарихында тұңғыш рет көкпардан ашық Азия чемпионатының өтуі ұлттық спортымыздың шын мәнінде ұлықталып жатқанының көрсеткіші екенін айтты.
Сондай-ақ осы басылымда «Ембімұнайгаз» АҚ бас директоры Махамбет Досмұхамбетовпен арадағы сұхбат «Өндірістің және өңірдің дамуы — өзекті міндетіміз!» деген тақырыппен жарияланды. Басылым тілшісінің барлық сауалына тұщымды жауап берген ол: «Егер біздің кәсіпорынды тек мұнай игерумен айналысады деп ойласа, бұл біржақты пікір болар еді. Біз үшін өндірістік мәселелермен бірге әлеуметтік саясатты қатар алып жүру — басым бағыттарымыздың бірі. Атырау облысы мен отандық мұнай өндіруші компания арасында өзара түсіністік және ынтымақтастық Меморандумына осымен бірнеше жыл қатарынан қол қойылып келеді. Мақсат — мұнайлы өңірдің инфрақұрылымын дамыту, халықтың жағдайының жақсаруына үлес қосу, Атырау өңірінің экономикалық-әлеуметтік дамуына үнемі қолдау көрсету. Жыл сайын жер қойнауын пайдалану келісімшартының негізінде жергілікті бюджетке 270 млн теңгеден аса қаржы аударамыз. Бұл қаражат облыс әкімінің келісімімен жергілікті өңірдің әлеуметтік мәселелерін шешуге жұмсалады. Биылғы жылдың бөлінген қаражатына тоқталар болсақ, Исатай ауданы Х.Ерғалиев, Тұщықұдық селоларының ішкі жолдарын күрделі жөндеуге, Мақат ауданындағы спорт (футбол) алаңдарының құрылысына бөлінді. Атырау қаласының Азаттық даңғылындағы, Абай, Махамбет, Молдағалиев көшелерінің бойындағы көпқабатты тұрғын үйлердің қасбеттері күрделі жөндеуден өтті. Облыс аумағында ұйымдастырылатын әртүрлі мәдени-спорттық шараларға үнемі демеушілік көрсетіп келеміз», — дейді.
