Назарбаев қазақ тілінен емтиханды беске тапсырды

Президент сайлауына қатысты шешімін бүгін қабылдаған Нұрсұлтан Назарбаев көп созбастан емтиханды да тапсырды. Съезден кейін Орталық сайлау комиссиясына келген Елбасыға да лингвистикалық комиссия үш тапсырма берген. Президенттің мемлекеттік тілде мүдірмейтіні барлығына аян болғанымен, конституция талабы сондай. Ал бір жарым сағат емтихан барысында Елбасы бір де бір қате жібермепті. Енді алғашқы сыннан сүрінбей өткен өзге екі үміткер секілді Назарбаев та кемінде 93 мың сайлаушысының қолын жинауы тиіс.

Саяси науқанға қатысты шаруаларды реттеген соң Елбасы бірден облыс әкімдерінің басын қосып, кеңес өткізді. Президент 14 аймақ пен Астана және Алматы қалаларының басшыларын халықтың мұң-тұқтажын тыңдап, етене жұмыс істеуге шақырды. Әсіресе, сайлау кезінде қоғамдық-саяси тұрақтылықты қамтамасыз ету, биылғы жылыту маусымын үзіліссіз аяқтау,тарифті қадағалау міндеттелді. Елбасы назарынан бюджет қаражаттарын басқару мен көктемгі егіс жұмыстарына дайындықты қамтамасыз ету де тыс қалған жоқ. Өңірлерді әрі қарай дамытуға міндетті әкімдер мемлекет басшысынан нақты тапсырмалар алып тарқасты.

</br>