24 наурыз күні Халықаралық ТҮРКСОЙ ұйымы мен ЮНЕСКО-дағы түркітілдес елдердің тұрақты өкілдерінің ұйымдастыруымен ЮНЕСКО-ның Париж қаласындағы штаб-пәтерінде түгел түркінің ұлы күні — Наурыз мейрамына арналған концерттік кеш өтеді, деп хабарлады халықаралық ұйымның баспасөз қызметінен. Наурыз мерекесі — бүкіл түркітілдес халықтардың басын біріктіретін, құндылықтарды әлемге паш ететін ата-бабадан қалған мәдени мұра. Халықаралық түркі мәдениеті мен өнерін дамыту ұйымы ТҮРКСОЙ жыл сайын дәстүрлі түрде Наурыз мерекесіне арналған концерттік кештер ұйымдастыратыны мәлім.
5 қаңтар 2015 жылы ТҮРКСОЙ штаб-пәтеріне ресми іс-сапармен келген ЮНЕСКО Бас директоры Ирина Боковамен Халықаралық Наурыз мерекесін өткізуге байланысты жасалған келісім бойынша 24 наурыз 2015 жылы Наурызға арналған мерекелік кеш өтеді.
Айтулы халықаралық шараға Әзербайжан, Қазақстан, Қырғызстан, Түркия, Өзбекістан, Түркіменстан, Молдова, Моңғолия сондай-ақ, Ресей Федерациясының құрамындағы Татарстан, Башқортостан, Алтай, Тува, Саха-Якутия, Хакасия, Дағыстан сынды елдерден 100-ден астам талантты өнерпаздар қатысады. Елімізден Қазақстан халық әртісі Роза Рымбаева, «Сазген сазы» фольклорлық-этнографиялық ансамблі және «Асылым» халықтар биі ансамблі өз өнерлерін көрсетеді.
Сонымен қатар, мерекелік шара аясында ТҮРКСОЙ-дың «Наурыз бояулары» атты фотокөрмесі өтеді.
Наурыз мерекесіне арналған концерттік кештер тек, Париж қаласында ғана өтпейтіні белгілі. ТҮРКСОЙ-дың ұйымдастыруымен 18-30 наурыз күндері аралығында Түркияның 20-дан астам ірі-ірі қалаларында Наурыз мерекелік концерттік кештер өтетіндігін хабарлаймыз.
