Қарасай ауданында жергілікті полицияға Іргелі ауылының тұрғыны пәтерді жалға алып, сол жерде сәбиін тастап кеткен азаматшаны табу жөніндегі өтінішімен барған.
Оқиға орнына шыққан жедел-тергеу қызметі бала жылап, көршілердің назарын аудартқанын, сөйтіп, көршілер үй иесін шақыртып, бөлменің есігін сындырып кіріп 7 айлық қызды байқағанын анықтады.
«Белгілі болғандай, анасы тастап кеткен қыз 2015 жылдың мамырында дүниеге келген. Жедел-тергеу шаралары кезінде «көкек ана» табылып, ұсталды. Бұл 22 жастағы Іле ауданының тұрғыны болып шықты» — деді ІІД.
Полицейлер ҚР ҚК 119-бабы бойынша сот алдындағы тергеуді бастап кетті. Күдікті әйелден «келу туралы міндеттеме» алынды.
«Тергеу уақытында сәби перзентханаға орналастырылды» — деді облыстық полицияда.