Мұз ойылып, үш жігіт көлге батып кете жаздады - Қарағанды облысы

Қарағанды облысында үш жігіт көлігімен қоса Балқаш көліне батып кете жаздады. Бұл туралы облыстық төтенше жағдайлар жөніндегі департаментінің баспасөз қызметіне сілтеме жасаған egemen.kz хабарлады.

Оқиға Техснаб елді мекенінің маңында болды. Автокөлікті көтере алмаған жұқа мұз ойылып кетіп, машина суға жартылай батқан. Көлік ішіндегі үш жігітті Балқаш қалалық жедел-құтқару отрядының жауынгерлері құтқарып қалды. Зардап шеккендерге медициналық көмек көрсетілді. Қазіргі уақытта олардың денсаулығына төнген қауіп жоқ.