Осыдан 4 жылдай бұрын алғашқы желісі пайдалануға берілген метромен қатынайтын жолаушылар саны қазір әлдеқайда өскен. «Мәскеу» және «Сайран» бекеттері ашылғаннан кейін, тәулігіне жерасты жүрдек пойыздарымен қатынайтын адам саны 40 мыңға жетті. Ал бұрын күніне 25 мыңға жуық адам тасымалданған екен. Қазір қалада 7 метро бекеті бар. Болжам бойынша, биыл экологиялық тұрғыдан таза саналатын жерасты көлігінен келетін жылдық табыс көлемі 40 пайызға өспек. Яғни, биылғы кіріс 700 миллион теңгеге жуық қаржыны құрауы мүмкін.
Айдын Оразханов, «Метрополитен» мемлекеттік коммуналдық кәсіпорнының директоры:
— Жаңа метро пойыздарын алуға байланысты құжаттар инвестиция және даму министрлігіне жіберілді. Бұл мәселені еліміздің қаржы министрлігі де қарап жатыр. Енді ұсыныс бюджет комиссиясының қыркүйек айындағы отырысында талқыланбақ.