Мусса Укабирдің Барселона орталығында бір топ жаяу жүргіншіні қағып кетіп, кейіннен ұсталған Дрисс Укабирдің ағасы екені айтылады. Басылымның мәліметінше, Мусса Укабир бір топ адамды қағып кетіп, бірден оқиға орнынан жасырынған. Кейбір БАҚ оның қаруланған болуы мүмкін екенін айтады.
Айта кетейік, осыған дейін Каталонияның құқық қорғау органдары Барселонада теракт жасаған адамда қарудың болмағанын мәлімдеген еді. ABC газеті де полициядағы дереккөздеріне сілтеме жасай отырып, осы терактіде басты күдікті 17 жастағы Мусса Укабир екенін айтады. Дрисс Укабир осыған дейін сексуалдық мәндегі қылмыстар үшін жазаға тартылған екен және Фигерас қаласында қамауда болған. Полициядағылар ресми түрде үш адамның қамауға алынып, бес лаңкестің көзі жойылғанын растады.
Еске сала кетейік, осыған дейін Испанияда бір тәулікте екі теракт болғаны жайлы хабарланған болатын. Барселонада фургон жаяу жүргінші жолында тұрған бір топ адамды қаққан. 13 адам қаза тауып, жүзден аса адам зардап шеккен. Кейін осындай оқиға каталонияның Камбрильсінде болды, оның салдарынан жеті адам зардап шекті.
Сондай-ақ, Қазақстанның СІМ өкілдері теракт кезінде зардап шеккендердің ішінде қазақстандықтардың болмағанын хабарлаған болатын.
