Еуропалық скрининг стандарттарын енгізу арқылы Қазақстанда сүт бездері рагын азайтуға болады

«Әйелдер арасында бұл аурудың жоғарылығы соншалық, ол жалпы халық арасындағы онкологиялық дерттің 26 пайызын құрайды», - деді ол сәрсенбі күні «Интерфакс-Қазақстан» агенттігінің баспасөз орталығында өткен баспасөз мәслихатында. Қ.Нұрғазиевтің айтуынша, 1-стадиядағы сүт безі рагын емдеу бюджетке 110-120 мың теңгеге, ал 4-стадияны емдеу 27 млн теңгеге түседі. Оның 96 пайызы дәрі-дәрмекке жұмсалады. Статистикалық деректерге сүйенсек, Қазақстанда жыл сайын сүт безі рагына 3 мыңнан астам адам шалдығады екен. Бұрын бұл ауру қартаң әйелдерде болатын болса, қазір 20-30 жастағы келіншектер де сырқат тырнағына ілігіп жатады. Осы орайда Ұлттық салауатты өмір салтын қалыптастыру орталығы директорының орынбасары Татьяна Слажнева «денсаулық сақтау саласы аурудың алдын-алуға бет бұрғанын, оның негізгі бағыттарының бірі скринингтік зерттеулер екенін» атап өтті. «Денсаулық сақтау жүйесінің ұйымдастыру шараларына қарамастан, халықтың скринингтік тексеруге ынтасының жоқтығы үлкен проблемаға айналып отыр», - деп қосты ол. 2011 жылы 50 мен 60 жас аралығындағы 443 мың 862 әйел маммографиялық зерттеуден өтсе, биылғы жылдың бірінші жартысында 222 әйел өткен.