Құқық қорғау органдарының өкілдері тайлы-тұяғы қалмай жиылған алқалы жиында 2015 жылы атқарылған жұмыстар қорытындыланды. Ал биылғы жылдың басты жаңалығы, жергілікті полиция қызметі енгізілді. Министр Қалмұханбет Қасымов тәртіп сақшыларына деген халық сенімін арттыруда бұл бастаманың сеп боларына сенім білдірді. Келелі кеңесте қылмыстарды ашудың және тергеудің жаңа тетіктерін әзірлеу қажеттігі туындағаны сөз етілді. Қылмыстық атқару жүйесін жаңғырту жайы да әңгімеге арқау болды. Кеңейтілген отырыстың қорытындысы бойынша, өңірлік департамент басшыларына нақты тапсырмалар жүктелді.
Қалмұханбет Қасымов, ҚР Ішкі істер министрі:
— Жергілікті полиция қызметі бізге екі проблеманы шешуге мүмкіндік береді. Біріншіден, жергілікті атқарушы органдардың өңірлердегі қоғамдық тәртіпті қорғауды қамтамасыз етудегі рөлі мен жауапкершілігі артады. Сонымен қатар жергілікті деңгейде профилактика жүйесі құрылып, дамиды. Екіншіден, жергілікті полиция құқық қорғау қызметін халыққа жақындата түседі және полицияның жергілікті қауымға есеп беруін арттырады.