Бұл туралы ҚазАқпарат агенттігінің ресми сауалына Бас прокуратурадан хабарланды.
Атап айтқанда, интернет желісінде суицидтік мінез-құлықты насихаттау балалар суицидін тудыратын факторлардың біріне айналып отыр. Бас прокуратураның атап өтуінше, өз-өзіне қол жұмсаудың әдістері ашық жариялануда, сондай-ақ интернет-сайттарда отыратындардың қарасы қалың.
«Осыған байланысты ҚР Байланыс және ақпарат агенттігімен бірлесе прокуратура органдары балалардың өміріне және денсаулығына қауіп тудыратындай іс-қимылдарға түрткі болатын, оның ішінде өз-өзіне қол жұмсауға итермелейтін интернет-сайттарға мониторинг жүргізу және оларды жабу жұмыстарын жүргізуде. Прокуратура органдарының талап-арызы бойынша сот шешімдерімен шетелдік алты интернет-ресурстердің таралуына шектеу енгізілді. Олар кәмелетке толмағандар арасында суицидтік мінез-құлықты насихаттаумен айналысқан»,-делінген хабарламада.
Ведомство мәліметінше, биылдың 6 айында кәмелетке толмағандар арасында суицид оқиғалары төмендеді (2013 жылдың 6 айында 131 оқиға). Биыл бұндай 98 оқиға тіркелді. Сонымен қатар суицид жасауға талпынғандар саны азайды, өз-өзіне қол жұмсауға әрекет етудің 255 жағдайы анықталды (319).