Ерте жеткен қыс Елорданың коммуналдық қызметінің дайындығын көрсетіп берді. Бір айдың мөлшеріндегі жауған қардың уақытылы тазартылмай жатқанын бүгін қала әкімі Әділбек Жақсыбековтың өзі де мойындады. Бұл Астананың сыртындағы қар шығаратын төрт полигонның бірі. Арнайы техникалар қала ішін толтырған ұлпа қарды осында әкеп төгеді. Кешегі бұрқасын дауылдан кейін мұнда жұмыс қыза түскен, көліктер лег-легімен ағылып келуде.
-Бір жұма болды.Қар жетеді. Енді күніне 15 текше метр қар шығарып жатырмыз.
-Қар таситын техникалар мұнда толассыз ағылып келуде. Соның өзінде үлгере алар емес. Қазірдің өзінде аппақ қар мұнда тау-тау боп үйіліп те қалған. Ал нағыз қыс басталғанда жағдайдың қалай боларын елестету тіпті қиын. Себебі, желтоқсан айы әлі келіп те жеткен жоқ.
Солтүстікте жауған қалың қардың үстіне бүгін бет қызартқан аяз қосылды. Таң атпастан термометр Астанада -27-ні көрсетіп тұр. Қызылжар мен Қостанайда да осындай жағдай. Сенбі күні +4 градус болып тұрған Солтүстік Қазақстанда арада бір күн өткенде сынап бағаны -28-ге бір-ақ сырғыған. Ал Қостанайда -26. Салдарынан Астана мен Қызылжарда бастауыш сыныптар үшін сабақ өтпей қалды.
Синоптиктердің болжауынша, қарашаның соңына қарай тағы бір аяз күтілуде. Ал алдағы бірер күндікте ауа-райының сипаты мынадай болмақ.
Әлия Оспанова, «Қазгидромет» орталығының инжинер-синоптигі:
-Еліміздің басым бөлігінде антициклонның ықпалымен ауа температурасы түнде 13-20, кей жерлерде 25-33 градус аязға дейін төмендейді. Жауын-шашынды күн райы байқалып, сонымен қатар бұрқасын байқалуы мүмкін.
Осылайша қыстың алғашқы ызғары солтүстікті біраз әуре сарсаңға салды. Ал бұл әбігердің қашан басылары белгісіз. Себебі, синоптиктер ертең де күннің аяз болатынын болжап отыр.