Сот баспасөз қызметінің хабарлауынша, 68 жастағы әжей немересін үнемі «ақша таппайтын арамтамақ» деп кінәлап келген көрінеді. Мұның соңы ұрыс-керіске ұласып, әжей жасөспірім немересінің ар-намысын аяққа таптап келіпті.
Қайғылы оқиға осы жылдың 13-наурызында болған. Іс материалдарына сүйенсек, сол күні үйге түн ортасында оралған балаң жігітті әжей тағы да айқайдың астына алған. Бала «Себепсіз айқайлап, коммуналдық қызмет үшін ақша талап ете бастаған» әжесінің байбаламына көңіл бөлмей, құлағына құлаққап киіп алады. Алайда, ашуы басыла қоймаған кейуана баланың намысына тиюді доғармаған.
«Ашуға булыққан (аффект) жасөспірім кемпірді итеріп жіберген. Әйел есіктің жақтауына басын соғып құлайды. Сол кезде немересі алдымен оны тұншықтырып, содан соң ас үйдегі пышақпен бірнеше жерден пышақтап тастаған. Әйел сол жерде жан тапсырды», делінген хабарламада.
Кешенді сот-психиатриялық сараптамалар жасөспірімнің жүйке сырқатына шалдықпағанын және қылмысты қатты ашу үстінде істегенін дәлелдеп берді.