Енді осыны тарқатып шығайық.
Жыл сайын дүниежүзілік бейресми жалпыкомандалық қорытынды есеп жүргізіледі. Қысқы маусым бөлек, жазғысы бөлек. Онда Олимпиада ойындары бағдарламасына енетін спорт түрлері бойынша өткен әлем чемпионаттары қорытындыланады.
Яғни барлық әлем чемионаттарындағы жүлделер есепке алынып, қай елдің спортшылары қанша медаль алғаны саналады. Сол бойынша бейресми жалпыкомандалық есеп түзіледі.
Қысқы спорт түрлерінде мұндай тізімге ілікпегенімізге бірталай жыл болған. Шамамен 17-18 жыл болған шығар. Өйткені біздің есімізде қалғаны — сонау 1995-96 жылдардағы жүлделер ғана.
1995 жылы қазақ спортының жарық жұлдызы Владимир Смирнов Тандер-Бейде (Канадада) өткен әлем чемпионатында үш алтын, бір қола алған. Ал конькиші қызымыз Людмила Прокашева 1995 жылғы әлем чемпионатында классикалық көпсайыстан күміс жүлдегер атанып, 1996 жылы 3000 метрлік қашықтықта қола жүлде еншілеген.
Рас, қазір конькимен жүгіру спортынан Қазақстан ұлттық құрамасының бас бапкері болып жүрген Вадим Саютин 1999 жылғы әлем чемпионатында күміспен күптеліп (классикалық көпсайыс), 2001 жылы 10 000 метрлік алыс қашықтықта қола медаль жеңіп алған. Бірақ Саютин 1994 жылы Ресейдің конькиші қызы Светлана Баженоваға үйленіп, сол жылдан бастап Ресей азаматтығын алып, осы елдің намысын қорғаған…
Айтпағымыз бұл емес. Тек әлгі қысқы маусымдар қорытындысындағы тізімге ілікпей кеткенімізге бірнеше жыл болғанын тілге тиек ету еді. Сол тізімге көптен бері биыл ғана ілігіп отырмыз.
Биыл қысқы Олимпиада ойындары бағдарламасына кіретін 15 спорттың түрінен әлем чемпионаты өтіп, барлығы 98 медаль жиынтығы сарапқа салынуы керек екен. Соның 97-сі сарапқа салынып болып, біреуі ғана қалыпты. Тек шайбалы хоккейден ерлер арасындағы әлем чемпионаты өтпеген.
Өздеріңіз білесіздер, шайбалы хоккейден ерлер арасындағы биылғы әлем чемпионаты 3-9 мамыр аралығында Швеция мен Финляндияда өтеді. Бірақ дәл осы бүкіләлемдік біріншіліктің қорытындысы бейресми жалпыкомандалық есепке көп өзгеріс енгізбейді.
Сондықтан біз осы бейресми жалпыкомандалық есептегі тізімге көз жүгіртуді жөн санап отырмыз.
Жоғарыда жазғанымыздай, Қазақстан — екінші ондықта, Австралиямен 17-орынды бөлісіп тұрмыз. Биыл біз де, Австралия да әлем чемпионаттарынан төрт жүлде (бір алтын, бір күміс, екі қола) олжалаппыз.
Біздің елден кімдердің жүлде алғанын білесіздер. Конькиші Денис Кузин 22 наурыз күні Сочиде өткен әлем чемпионатында 1000 метрлік қашықтықта үздік шығып, алтынмен апталды.
Денис Тен 15 наурыз күні мәнерлеп сырғанаудан Канаданың Лондон қаласында өткен әлем чемпионатында (ерлер арасындағы сында) екінші орын алып, күміспен күптелген болатын.
Бұған дейін шаңғышыларымыз екі қола алған болатын. 20 ақпаннан бастап, 2 наурызға дейін Италияның Валь-ди-Фьемме деген курортында өткен ХХХІХ әлем чемпионатында ел қоржынына екі қола түскен-ді. Әуелі Алексей Полторанин мен Николай Чеботько командалық спринтте үшінші орынға ие болса, одан кейін Алексей Полторанин 50 шақырымдық аламан бәйгеде мәре сызығын тағы да үшінші болып қиған.
Міне, осылай биылғы қысқы спорт түрлерінен өткен әлем чемпионаттарынан төрт жүлде алғанбыз. Бұларға қоса, 27 қаңтардан 3 ақпанға дейін бендиден Швецияда өткен ХХХІІІ әлем чемпионатында қола медаль жеңіп алғанбыз. Бірақ бенди Олимпиада ойындары бағдарламасына кірмейді. Сондықтан бұл жүлдеміз биылғы қысқы маусым қорытындысындағы бейресми жалпыкомандалық есепке енбейді.
Биыл 15 спорттың түрінен өткен әлем чемпионаттарында 26 ел жүлде алыпты. Енді соларға атүсті тоқталып өтейік:
1. Норвегия — 34 (17 алтын, 7 күміс, 10 қола)
/биатлон — 11 (8+2+1); шаңғы жарысы — 16 (7+4+5); тау шыңғысы — 2 (1+0+1); шаңғымен тұғырдан секіру — 2 (1+0+1); шаңғы қоссайысы — 1 (0+1+0); сноуборд — 2 (0+0+2)/.
2. АҚШ — 28 (13+6+9)
/тау шаңғысы — 5 (4+0+1); фристайл — 8 (3+1+4); мәнерлеп сырғанау — 2 (2+0+0); сноуборд — 2 (1+1+0); хоккей (әйелдер) — 1 (1+0+0); шаңғы жарысы — 1 (1+0+0); шаңғымен тұғырдан секіру — 1 (1+0+0); конькимен жарысу — 3 (0+1+2); бобслей — 2 (0+1+1); биатлон — 1 (0+1+0); скелетон — 1 (0+1+0); шаңғы қоссайысы — 1 (0+0+1)/.
3. Германия — 26 (9+7+10)
/шана спорты — 8 (4+3+1); бобслей — 4 (2+0+2); тау шыңғысы — 3 (1+1+1); сноуборд — 3 (1+0+2); шаңғы қоссайысы — 2 (1+0+1); биатлон — 2 (0+1+1); шаңғымен тұғырдан секіру — 1 (0+1+0); мәнерлеп сырғанау — 1 (0+1+0); конькимен жарысу — 2 (0+0+2)/.
4. Канада — 29 (7+12+10)
/фристайл — 7 (2+4+1); сноуборд — 4 (2+2+0); мәнерлеп сырғанау — 4 (1+2+1); шорт-трек — 5 (1+1+3); бобслей — 1 (1+0+0); кёрлинг — 2 (0+1+1); шана спорты — 2 (0+1+1); хоккей (әйелдер) — 1 (0+1+0); шаңғы жарысы — 1 (0+0+1); конькимен жарысу — 1 (0+0+1); скелетон — 1 (0+0+1)/.
5. Ресей — 23 (7+5+11)
/конькимен жарысу — 5 (2+0+3); шаңғы жарысы — 5 (2+0+3); мәнерлеп сырғанау — 2 (1+0+1); сноуборд — 2 (1+0+1); скелетон — 2 (1+0+1); шорт-трек — 2 (0+2+0); биатлон — 2 (0+1+1); бобслей — 1 (0+1+0); фристайл — 1 (0+1+0); хоккей (әйелдер) — 1 (0+0+1)/.
6. Франция — 18 (6+7+5)
7. Нидерландтар — 17 (6+7+4)
8. Оңтүстік Корея — 12 (6+5+1)
9. Қытай — 9 (6+1+2)
10. Швейцария — 9 (4+5+0)
11. Австрия — 16 (3+7+6)
12. Швеция — 11 (2+7+2)
13. Словения — 7 (2+3+2)
14. Ұлыбритания — 5 (2+1+2)
15. Польша — 7 (1+3+3)
16. Украина — 5 (1+1+3)
17. Қазақстан — 4 (1+1+2)
17. Австралия — 4 (1+1+2)
19. Чехия — 3 (1+1+1)
20. Финляндия — 4 (1+0+3)
21. Беларусь — 1 (1+0+0)
22. Жапония — 8 (0+4+4)
23. Италия — 7 (0+4+3)
24. Латвия — 2 (0+1+1)
25. Хорватия — 1 (0+1+0)
26. Испания — 1 (0+0+1)
