Құралай Арқабаева, судья:
— «Мерседес-Геленвагеннің» жүргізушісі Қанат Ахметовты, «Мерседес» мінген 23 жастағы Төлеген Әбиев және екі «Лексусты» басқарған Сержан Мәуленов пен 23 жастағы Қанат Рамазантегі бір жылға көлік жүргізу куәлігінен айырылсын.
Жеті бап бойынша жаза арқалаған төртеуге жарты миллион теңге айыппұл салынды. Жастары жиырмадан асқан жігіттер өңкей қымбат көлікті сенімхатпен жүргізген. «Геленваген» мінсе де, бәрі шетінен жұмыссыз екен. Ал судья елді шулатқан той кортежінің видеосын тура сот залында қарады. Бір қызығы қаланың қақ ортасында тайраңдаған машиналар көше бойындағы қаптаған камераға түспей қалыпты. Бейберкетсіздікті куәгерлер түсірмегенде іс жылы жабылып қалар еді. Астанадағы ең үлкен даңғылда шоу жасаған үйлену тойының кортежі Ішкі істер министрлігі Әкімшілік полиция комитеті төрағасы орынбасарының ұлына тиесілі болған. Баласының кесірінен Бақытжан Балташев амалсыз отставкаға кетті. Полковник зейнетақысы мен түрлі әлеуметтік жеңілдіктен қағылуы мүмкін.