Жарияланды: 360

Көшербаев бизнес бастауға берген ақшаны тойға шашқан жерлестерін ұялтты

Бизнес бастауға берген несиені бала-шағасының тойына шашқан! Қызылорда облысында адамдар кәсіп бастаймыз деп мемлекеттен жеңілдетілген пайызбен алған ақшасына дүркіретіп той өткізіпті. Мұндай дарақылыққа күйінген аймақ басшысы өзін ғана емес, Үкіметті алдап соққан пысықайларды банктердің маңайына мүлдем жолатпауды талап етіп отыр.

Бұл былықты бүгін Астанаға келіп 12 айдағы жұмысына есеп берген Қырымбек Көшербаев жасырмай жайып салды. Жерлестерін күллі елдің алдында ұялтқан Қызылорда облысы әкімінің күйінетін жөні бар.Өйткені, сол банктен алған миллиондар мақсатына жұмсалғанда, қаншама адам жұмыспен қамтылар еді. Алайда, мемлекеттің жеңілдетілген несиесіне кәсіп бастамақ болғандар қызын тұрмысқа беріп, ұлын үйлендіріп, туған күндерін тойлатқан. Енді даңғойлардың кесірі шынымен шағын бизнесін бастағысы келетіндерге тиуі мүмкін. Оңай олжаны көздегендердің қулығы әшкереленген соң, әкімдік несие алғысы келетіндерге талапты күшейтіп жатыр.

Қырымбек Көшербаев, Қызылорда облысының әкімі:

-Берілген несиені орынды жұмсап, кәсіп ашқан адамға екінші рет қарыз беріледі. Яғни, негізгі борышты қайтарған соң аз пайызбен үш миллион емес, бес миллион теңге алуға болады. Ал, микрокредит алып, оны туысының тойына жұмсағандар бірден қара тізімге енеді. Және олар еліміздегі бірде бір банктен мемлекет есебінен жеңілдетілген несие ала алмайды.

Пікір қалдырыңыз

Пікір қалдыру тіркелген пайдаланушылар ғана мүмкін