Бұл туралы бүгін дипломатиялық корпустың өкілдері үшін өткен брифингте ҚР СІМ басшысының бірінші орынбасары Рәпіл Жашыбаев мәлім етті.
Бұл тізімде АҚШ, Нидерланды, Ұлыбритания, Франция, Германия, Италия, Малайзия, Біріккен Араб Әмірліктері, Корея Республикасы және Жапония бар.
«Қанатқақты жобаны біз биылғы 15 шілдеден бастаймыз. Ол 2015 жылдың 15 шілдесіне дейін жалғасады. Аталған мемлекеттердің азаматтары Қазақстан аумағында іскерлік немесе өзге мақсаттар бойынша 15 күннен астам уақытқа қалғысы келсе, онда олар ішкі істер органдарына іскерлік визаны рәсімдеу туралы өтінім беруі тиіс. Осы орайда бұл шетелдік азамат визаны 30 күнге дейін ұзарта алады. Егер де инвестор бұдан ұзақ мерзімге қалуға ниеттенсе, ол ҚР Сыртқы істер министрлігіне жолығуы қажет. Біз осы бағытта оған 3 жылға дейін рұқсат беретін инвесторлық визаны рәсімдейміз», — деді Р. Жошыбаев.
Сонымен қатар вице-министр аталған 10 мемлекет Қазақстан азаматтары үшін визалық тәртіпті жеңілдету шараларын бастағанын атап өтті. Мәселен, Малайзия біржақты тәртіпте қазақстандықтарды 30 күнге дейін визалық рәсімдеу қажеттілігінен босатты.
Бұдан бұрын хабарланғандай, кеше ҚР Президенті жанындағы Шетел инвесторлары кеңесінің 27-ші жалпы отырысы барысында Елбасы Нұрсұлтан Назарбаев Қазақстан біржақты тәртіппен 10 мемлекет азаматтары үшін визасыз режім орнататынын мәлімдеген болатын.
«Бизнес байланыстарды, кәсіпкерлердің халықаралық кооперациясын кеңейту үшін визалық тосқауылдарды жою қажет. Бүгінде біз Қазақстанда барынша жоғары инвестициялық белсенділік көрсеткен 10 мемлекеттің азаматтары үшін визасыз режімді біржақты бекіту турасында жария етеміз», — деді Н.Назарбаев.
